MANILA — Nilinaw ng Department of Justice (DOJ) nitong Biyernes na nananatili sa hurisdiksiyon ng mga awtoridad sa Czech Republic si dating kongresista Zaldy Co.
Ayon kay DOJ Spokesperson Atty. Polo Martinez, batay sa pinakahuling ulat, nasa ilalim pa rin ng hurisdiksiyon ng Czech authorities si Co.
“Latest report we have is he is still within the jurisdiction of Czech authorities,” ani Martinez.
Ginawa ang paglilinaw kasunod ng mga ulat na hindi umano inaresto si Co sa naturang bansa.
Binigyang-diin ni Martinez na may partikular na legal na kahulugan ang terminong “arrest.”
Aniya, “An intervention involving Zaldy Co took place in Czech Republic—this fact was wholly ascertained and remains undisputed.”
Dagdag pa niya, si Co, na nahaharap sa kasong graft at malversation kaugnay ng umano’y iregularidad sa flood control projects, ay “subject of official law enforcement action by Czech authorities.”
Sa tanong kung nakadetine si Co, sinabi ni Martinez na malilinaw ito sa oras na makipag-ugnayan si Justice Secretary Jesus Crispin Remulla sa Czech authorities.
(JULIET PACOT)
171 
